台文通訊：30冬紀念特刊 pdf epub mobi txt 电子书 下载 2025

1. 話頭——《台文通訊30冬紀念特刊》ê意義kap向望
1-1. 推薦文
1-2. 總編輯kap主編ê話

2. 《台文通訊》手稿kap歷史資料
2-1. 《台文通訊》合訂本
2-2. 《台文通訊》刊物相關相片記錄
2-3. 《台文通訊》讀者聯誼會成員相片記錄
2-4. 《台文通訊》代表性作家手稿
2-5. 《台文通訊》編輯團隊批信交流
2-6. 《台文通訊》北美台語文運動ê寫真回顧

3. 《台文通訊》30冬——Ùi海外到島內，近代台文運動起鼓
3-1. 《台文通訊》發展史
3-2. 《台文通訊》30冬ê意義
3-3. 《舌尖與筆尖 — 台灣母語文學的發展》（國立台灣文學館出版）內容摘要
3-4. 北美地區台語文ê研究、教學kap推廣（李勤岸 2004）

4. Têng頭看《台文通訊》ê感想
4-1. 《台文通訊》編輯團隊kap貢獻者回顧
4-2. 《台文通訊》讀者聯誼會回顧
4-3. 《台文通訊》作者回顧
4-4. 《台文通訊》讀者回應kap寄望

5. 《台文通訊》30冬文kéng——咱koh讀koh想
5-1. 台文通訊ê運動性kap發展，包括讀者聯誼會
5-2. 台灣語文意識、台灣意識kap相關論述
5-3. 台語文學kap羅漢書寫實踐
5-4. Ùi無kāng角度來看台文通訊

6. 感謝名單

作者序

　　今年是《台文通訊》創刊第30週年，tī這個時間點出版「《台文通訊》30冬特刊」有特別ê意義。

　　2019年「23rd世界台語文化營」tī洛杉磯舉行，bē-chió 40歲以下ê草根台語文運動者，ùi台灣來參加。有「做伙來講台語 sńg kah 烏má-má 好無？ 協會」 ê Tiuⁿ Sió-ngá，「意傳科技」Sih Sêng-hông ，「台文博覽會」，「台文博覽會」、「ChhoeTaigi」、「台文雞絲麵」ê負責人Ngô͘ Hê-bí等。In建議海外ê台語文運動者kā過去ê歷史寫--落-來，thang見證、累積、傳承in救護台灣語言所做過ê努力，mā thang鼓催中華民國體制內困難做到ê「台語文化轉型正義kap復興」。可惜座談會發言ê人真chē，無時間討論議案，這項建議無得著應該有ê討論。

　　無拍算，吳家銘（Hê-bí）無死心，2020年秋主動來招我做編輯「《台文通訊》30冬特刊」ê事工，叫我做總編輯。Kā我講我kan-na負責tàu kéng（海外時期）《台文通訊》內面無仝階段代表性ê文章，鼓勵人來寫回顧to̍h ē-sái。編輯，公開募資，出版，通路等執行ê工作伊歡喜來負責。

　　Hō͘伊對傳承台語文化迫切ê危機感kap鬥志感動--著，我招《台文通訊》加拿大連絡人吳景裕（陳雷），kap《台文通訊》台灣總連絡人陳豐惠做伙來做共同總編輯。家銘koh招鄭智程、紀品志、林碧堂來做共同主編。智程是成大台文系研究所學生，傑出新世代ê台語文草根運動者。品志是台大是台大農業化學系學士，荷蘭Leiden大學語言學碩士。碧堂是台南神學院道學碩士，台灣教會公報台文版主編。
 
　　另外，家銘koh招40幾位志工，beh kā《台文通訊》數位化，方便少年人tī手機讀《台文通訊》ê 文章，mā ē-tàng方便語言學者對台灣語文運動史ê研究。這個編輯團隊來自三個無仝國家，三個無仝世代，象徵海內外台灣人毋肯放棄，迫切beh救護傳承台語ê決心。

　　有關台語文運動史ê整理kap台語文獻資料ê收集已經有體制內外ê單位bat做--過。「《台文通訊》30冬特刊」kap數位化ê計畫敢有啥物特殊ê意義？

　　第一：鼓勵青年人讀海外時期ê《台文通訊》
 
　　《台文通訊》海外主筆群真chē是台灣人ê精英，in tī各人專業有傑出ê成就。In ùi國外看台語文化ê問題，有多元多樣ê內容，現代智識kap台灣精神ê營養份真高。可惜《台文通訊》是小眾傳播，絕大部份台灣人m̄-bat聽過有這份刊物。出版「《台文通訊》30冬特刊」有典藏1991-2011年彼時期ê台語文運動史料kap台語台灣文學發展史ê作用。M̄-koh上大ê意義猶是hō͘少年人ē-tàng tī網路讀ē著早期《台文通訊》ê作品。Hō͘ 1975年「紐約台灣語文推廣中心」，1977年《台灣語文月報》，1991年《台文通訊》 ，1993年「聰美姊紀念基金會」，1997「Toronto 台灣語文中心」，後--來轉去到台灣「李江却台語文教基金會」這段台語文運動寶貴ê經驗，會當繼續傳--落-去，成做台語文化ê肥底。
 
　　這幾冬來bē-chió獨派ê少年人，意識著台語文化斷種ê危機，開始想beh kā台語學--轉-來。可惜，台灣主要ê文化通路——教育體制／大眾媒體——猶是hō͘華語霸權pà tiâu--leh，台灣人猶是看輕家己爸母話文化，欠缺語言文化自尊心kap自信心。網路社群有關台語ê討論khah-chē--ê是這句中文台語beh按怎寫這款技術性ê問題。對華語霸權無公義，結構性ê問題khah chió有深入ê討論。《台文通訊》對台灣語言文化ê論述超越「我手寫我口」技術性ê文字訴求，強調精神層面ê台灣主體性，科學精神，社會性，現代性，前瞻性。這款夢想，超越形式上ê台灣國，是teh望想理想ê台灣國。

　　早期《台文通訊》文學作品大部份是teh講出外台灣人ê故事，內面有in對「故鄉」人kap事ê感情，充滿對台灣將來ê期待。這款作品有特別ê時代意義kap氣味。

　　《台文通訊》信仰性ê文章鼓勵台灣人更新心靈，自我要求，啟發台灣民族ê自信心，發揚台灣精神。台語文化ê復興m̄-nā需要「我手寫我口」ê台語文技術，閣卡需要--ê是建立民族自信心。台語消失是政治問題，心理問題，m̄-sī技術問題。台灣人需要對華語霸權所致ê斯德哥爾摩受逆性格（註*）ê心結覺醒出來。讀《台文通訊》m̄-nā ē-tàng增加用台語思考讀文章ê能力，mā有提昇台灣精神境界ê效果。

　　第二：促進跨世代跨國界跨領域新階段ê台語文運動

　　這本特刊編輯過程ê本身就是一個網路世代新型草根台語文運動。這一冬來m̄-nā有跨國線頂編輯會議，koh舉行過30幾場ê 「《台文通訊》30冬線頂讀者聯誼會」，每禮拜六台灣時間暗時10點，來自加拿大、美國、法國、瑞士、荷蘭、西班牙、日本、台灣各所在ê各種專業人士定時聚會，輪流做主持人，設定主題，安排來賓，探討台灣文學、台語電腦科技應用、台語文歷史、語言政策、大學台語文教學ê實踐經驗、台語消費者運動、台語翻譯機器人、母語地圖ê製作kap應用、線頂台語教學、網路消費者運動、體制內外台語文運動等議題。「《台文通訊》30冬：線頂讀者聯誼會」kap 「《台文通訊》30冬：台灣文學欣賞」ê活動結連18歲到82歲，ùi台灣、日本、加拿大、美國到歐洲ê台灣語文草根運動工作者，通過網路形成一股新ê台語文運動ê力量。

　　第三：檢驗、更新過去台語文運動ê論述

　　這30冬來台灣ê社會語言環境有真大ê變化。雖然有「國家語言發展法」通過，kap「公視台語頻道」成立，m̄-koh台語家庭ê囡仔已經失去講台語ê社會環境。救台語ê時機敢已經慢--去ah？

　　90年代台語文運動主張用台語文化建立台灣國ê論述tī 2020年代，敢猶有適用？ 造成台語流失ê根本結構敢會改變？Beh按怎改變？ 網路世代自媒體ê興起對台語文運動有啥影響？ 台語死亡ê趨勢本土政權敢有想beh救？ 救敢會活？台語文化流失對國家安全有啥影響？ 過去雙語教育ê主張敢有需要調整？台灣少年人讀漢字台文頭殼內是用台語抑是華語teh思考？ 敢有能力正確掌握漢字ê台語發音？ 漢字白話字ê比例敢有需要調整？Beh按怎調整？面對目前台灣新ê語言文化環境，「《台文通訊》30冬特刊」邀請原作者來回顧30冬前ê文章，mā邀請新一代台語文運動者來發表in對《台文通訊》ê看法，希望ē-tàng更新台語文運動ê主張kap論述。

　　Tī chia beh利用這個機會koh一遍感謝30冬來為《台文通訊》寫稿、捐款ê朋友。雖然台語文化ká-ná強欲斷種，毋過相信咱已經kā種子iā tī咱久長所愛ê田園。有一日in會大欉出頭天，kap世界各種語言共存共榮，向前貢獻世界和平。

　　嘛beh特別感謝1977年創辦北美台灣人第一份報紙《台灣語文月報》ê李豐明、陳清風、鄭良偉。這份台文報紙啟蒙我ê台灣意識，開闊我ê世界觀。恁掖種，經過14冬《台文通訊》開花結果。願上天所賜，祖先所愛ê台語文化，有咱ê參與，一代koh一代繼續生thòaⁿ。

　　* 參考《台灣人「受虐性格」的心理分析》林毅夫精神科醫生，前衛出版。